O pasado venres, o escritor e académico Xosé
Luís Méndez Ferrín honrounos coa súa ilustre visita.
Don Xosé Luís, acompañado pola súa dona,
percorreu as instalacións do centro educativo e dialogou con parte do
alumnado.
Xa no nivel secundario, o insigne autor
ourensán estivo falando co alumnado do segundo curso de Bacharelato que tiña
traballado varios fragmentos da súa obra. Ademais diso, respondeu as súas
preguntas e achegou algúns consellos aos rapaces e rapazas que moi
ilusionados agardaban a súa visita.
Posteriormente, asinou no libro de ouro da
institución educativa e o señor secretario xeral da Fundación Galicia –
América, don José María Vila Alén, entregoulle uns modestos agasallos.
Xosé Luís Méndez Ferrín naceu en Ourense o
7 setembro de 1938. Está considerado coma o escritor galego máis
representativo e importante da literatura galega contemporánea.
Na súa infancia reside en Ourense con
estancias en Vilanova dos Infantes. Na cidade de Ourense fai o primeiro
curso de bacharelato, e trasládase, despois, en 1949, coa súa familia a
Pontevedra. É alí onde remata os estudos de grao medio.
Nos anos 50 faise consciente da realidade
galega, o que deixará nel unha fonda pegada nacionalista, que non
abandonará nunca.
En 1955 el e a súa familia trasládase a
Vigo. Neste momento é cando comeza a estudar Filosofía e Letras na
Universidade de Santiago de Compostela. Alí toma contacto co galeguismo
cultural, artillado en torno á Editorial Galaxia e á figura de Ramón
Piñeiro. En 1956 foi primeiro premio de poesía nas Festas Minervais de
Santiago. En 1957 vai a Madrid onde tres anos despois licénciase en
Filoloxía Románica. Nesta cidade mantén estreito contacto co galeguismo
alí radicado. Así, en 1958, créase o grupo Brais Pinto. O grupo
constituíuse en torno á editorial do mesmo nome. En 1961 segue un curso
de cultura inglesa na Universidade de Oxford. Entre os anos 1963 e 1965
realiza diversas viaxes por Europa. Despois de facer o servizo militar
en Canarias pasa dous anos, 1962 e 1964, en Lugo, exercendo de profesor
no Colexio Fingoi ata que en 1965 obtén a Cátedra de Lingua e literatura
Española do Instituto Santa Irene de Vigo, e instálase en Vigo.
Debido á súa actividade política foi
procesado en tres ocasións pasando nalgunhas delas un período no
cárcere.
Na actualidade, este doutor en Filoloxía,
ademais da súa faceta literaria, tamén é columnista no xornal Faro de
Vigo e dirixe a revista de pensamento crítico A Trabe de Ouro, que ten
marcado de xeito notábel na última década o devir da nosa cultura coa
difusión de problemas e investigacións sobre cuestións diversas con
aproximacións interdisciplinares, e baixo unha dupla perspectiva
nacional e universal. Ferrín é membro da Real Academia Galega e Doutor
Honoris Causa pola Universidade de Vigo.
Xosé Luís Méndez Ferrín foi proposto ó
Premio Nobel de Literatura no ano 1999 pola Asociación de Escritores en
Lingua Galega. Foi galardoado con moitos premios entre os que podemos
citar o Premio da Crítica, Premio da Crítica Española, Premio da Crítica
Galicia, Premio Losada Diéguez ou o Premio Eixo Atlántico.
