Visita do Sr.
director xeral de Promoción e Difusión da Cultura da Xunta
de Galicia, don Francisco López Barxas; Ramón Abal e Carlos
Airas, funcionarios do goberno galego; e Benigno Campos
>> 26 de abril de 2010
O pasado luns, 26 de abril,
recibimos a visita do Sr. director xeral de Promoción e
Difusión da Cultura da Xunta de Galicia, don Francisco López
Barxas, quen –alén de Ramón Abal e Carlos Airas,
funcionarios do goberno galego– veu acompañado de Benigno
Campos, recoñecido cociñeiro e presentador do programa
Larpeiros da Televisión de Galicia.
Durante a súa estadía no noso
centro educativo, o director xeral tivo oportunidade de
percorrer as instalacións, interiorizarse dalgúns dos
proxectos que desenvolvemos e coñecer o sistema de traballo
que empregamos. Asemade, asistiu á charla que mantivo
Benigno Campos co alumnado do nivel Secundario no salón
Xacobeo do instituto, durante a cal os rapaces e rapazas
puideron dialogar co prestixioso cociñeiro. Antes desta
intervención, don Francisco López Barxas dirixiulles unhas
palabras aos mozos e mozas inzadas de propostas de futuro.
Logo do devandito encontro, a
comitiva mantivo unha entrevista de traballo cos membros da
Delegación arxentina da Fundación Galicia América.
Dende esta páxina, desexamos
agradecerlle ao director xeral todas as atencións que nos
dispensou, tanto durante a súa estadía no instituto como nas
xornadas anteriores na Feira do Libro de Bos Aires.
Fotografías
+Info
Francisco López Barxas
Naceu en Ponte Barxas
(Ourense) o 24 de abril de 1952. É licenciado en Filosofía e
Letras pola Universidade Complutense de Madrid.
Desde o ano 1983, exerceu como
crítico literario na prensa nacional e revistas literarias.
Durante os anos 1984 e 85 foi redactor xefe da revista
Argumentos, cargo que tamén desempeñou na canle de
televisión Yurital News, entre 1989 e 91. Foi director do
Xornal Diario, en Pontevedra, os anos 1991 e 92. Na TVG,
exerceu de editor do informativo Bos Días entre o 2000 e
2003 e de redactor xefe de Informativos do 2003 ao ano 2005.
Profesor de Lingua e
Literatura no colexio Logos en Las Rozas (Madrid) entre os
anos 1987 e 1989, entrou a formar parte do Consello Reitor
da Universidade Antonio Nebrija en 1989. Ademais, no seu
labor docente impartiu cursos como profesor convidado en
distintas universidades como a Universidade Internacional
Menéndez Pelayo, a Universidade Complutense de Madrid ou a
Universidade da Coruña .
Publicou máis dunha ducia de
libros entre os que se atopan En torno a Antonio Machado (Gijón,
1.988), Antología de la Poesía Gallega (Madrid, 1.991),
Eugenio Granell. O surrealismo felizmente vivo (Vigo, 1.999)
ou O ladrón de paxaros (A Coruña, 2.006). Obtivo diferentes
premios literarios e actualmente colabora en numerosas
revistas e xornais.
.::.
Benigno
Campos Melón
Nacín en Chapela, (Redondela)
o 7 de agosto de 1949, o meu pai era Arnaldo e a miña nai
Lucila. Estudei Bacharelato no instituto Santa Irene e
colexio Alba de Vigo. Traballei durante 39 anos nunha
empresa de construción naval de Vigo, na oficina técnica;
como técnico de organización e proxectista. No ano 1971,
facendo o servizo militar en Madrid, comecei as miñas
andanzas na cociña; e convertinme nun verdadeiro
afeccionado, porque nunca foi esta a miña profesión, pero si
a miña paixón, o mesmo que a música popular galega. En 2008,
comecei a participar no programa da Televisión de Galicia
Larpeiros, á vez que escribín un libro de cociña con 150
receitas, chamado A cociña de Larpeiros editado en idioma
galego pola Editorial Galaxia. Este libro, en menos dun ano,
conseguiu chegar á oitava edición, con máis de 50.000
exemplares vendidos. Posteriormente, a editorial Everest
editou o mesmo libro traducíndoo ao castelán co título de La
cocina de Benigno Campos. Nunha semana esgotouse a 1ª
edición deste.
