O pasado sábado, día
10 de outubro, dúas rapazas e dous rapaces de 4º e 5º cursos do nivel
Secundario foron os encargados de representar a Galicia no VII Festival
Internacional de Teatro de Bos Aires.
Coa lectura dun
fragmento adaptado da obra teatral “A noite vai coma un río” do escritor
mindoniense Álvaro Cunqueiro, que dirixiu o profesor de teatro do noso
centro de estudos, Fernando Naval, achegaron a lingua e a literatura de
Galicia a toda a colectividade e a aqueloutras persoas interesadas en
afondar nun mundo marabilloso de ilusións e realidades.
Cómpre salientar tamén
que ao público asistente se lle entregou unha tradución ao castelán do
fragmento. Este traballo de translación lingüística realizouna o
alumnado de 5º curso de Bacharelato.
Dende esta páxina,
queremos agradecer o apoio do Sr. delegado en Bos Aires da Xunta de
Galicia e, do mesmo xeito, os ánimos e o entusiasmo de todas as persoas
que estiveron presentes na representación acompañando a magnífica
interpretación dos actores e actrices.
Alén do anterior,
desexamos tamén animar –sen facer distingos de ningún tipo– a toda a
xente interesada na nosa cultura a que nos acompañen neste movemento de
esparexemento cultural que o noso instituto emprendeu hai tempo e que
vai continuar desenvolvendo, co fin de espallar e acrecentar o
patrimonio cultural do noso pobo e así xunguir esforzos mancomunados que
eviten a dispersión e pouca difusión dos traballos desenvolvidos.
