O pasado mércores, 29 de abril, tivemos o honor de recibir ao escritor Xabier Puente Docampo e ao deseñador e ilustrador Xosé Cobas no noso instituto.

Nada máis chegar, logo dos saúdos pertinentes, dirixíronse á biblioteca dos niveis Infantil e Primario. Alí, xunto con algúns dos rapaces e rapazas de cuarto, sexto e sétimo cursos idearon un fermoso conto cheo de maxia e sentimento. Á vez, Xosé Cobas ía recreando con fermosas ilustracións as palabras que escritor e alumnado tan ben lograron conxugar.

Antes de rematar este encontro, Xabier respondeu algunhas preguntas que se lle formularon e escoitou compracido a lectura dun fragmento da súa obra a cargo dun grupo de alumnos e alumnas.

A continuación, na sala de reunións da Delegación Arxentina da Fundación Galicia América, diante dun pequeno almorzo, Xabier e Xosé asinaron o libro de ouro da institución educativa. Nese momento de descanso, houbo tempo para falar de novos proxectos, enunciar algúns dos traballos que se desenvolven a cotío no centro e explicar o funcionamento xeral da institución educativa.

A delegación arxentina da Fundación Galicia América agradeceulles a súa presenza e, en especial a Xabier, mostroulle institucionalmente o aprecio que por el temos. Cómpre salientar que foi Xabier Puente Docampo, hai catro anos, a primeira visita ilustre que tivemos e que mostrou grande interese polo traballo que desenvolvemos. Por ternos sempre presente e por ser o primeiro en darnos a coñecer dentro das fronteiras administrativas de Galicia, moitas grazas.

Ás once da mañá, escritor e ilustrador dirixíronse ao salón de actos Xacobeo para manter un encontro co alumnado do nivel Secundario do instituto. Nesa charla, Xabier comezou por contarlles aos asistentes un fermoso conto que Xosé Cobas, a partir das impresións que a el lle causou o relato, reflectiu nun magnífico cadro.

Compartindo maxias, lembrando bos momentos e ideando ilusións marabillosas a través da palabra e a imaxe, Xabier e Xosé contaxiaron ao alumnado que se mantivo sumamente atento e interesado por aprender da man de dúas das primeiras figuras da creación galega actual.

Para rematar, en sinal de agradecemento, entregáronselles a Xabier e a Xosé uns pequenos agasallos de recordo. Tamén se lle entregou un modesto presente a Helena Torres, responsable da Consellería de Cultura da Xunta de Galicia na 35ª Feira do Libro de Bos Aires, quen sempre estivo ao noso dispor para conseguir que estas visitas se puidesen levar a cabo.

Cómpre salientar que tanto o óleo como as ilustracións que Xosé Cobas realizou nesta a súa estadía no noso instituto foron doadas por el para o centro de estudos. En vindeiros días, poderán ser contempladas por todos os que o desexen nun lugar preferente que será anunciado con antelación.

Moitas grazas pola súa bondade e xenerosidade connosco.

 

Palabras de recibimento para o escritor Xabier Puente Docampo e ao deseñador e ilustrador Xosé Cobas pronunciadas pola alumna Tamara Moreno do Nivel Secundario

 

Autoridades, compañeiras e compañeiros, Xabier, Xosé… bo día.

Prezado Xosé, comezo por vostede.

Queremos, nesta a súa primeira visita ao noso centro de estudos, darlle a benvida e dicirlle que estamos moi ledos de poder contar coa súa presenza hoxe aquí. Agradecémoslle moito que quixera vir compartir connosco uns momentos do seu valioso tempo. Agardamos que se sinta a gusto e que se leve unha boa lembranza deste primeiro contacto connosco.

Por outro lado, Xabier, a vostede queremos transmitirlle a alegría que sentimos por telo de novo entre nós. Aínda recordamos con moito agarimo aquela visita súa aló polo ano 2005 cando chegou a Bos Aires por segunda vez e tivo a xenerosidade de vir aquí e estar con nós para falarnos un pouco de todo; da súa vida, dos seus sentimentos, das súas obras… Para contarnos contos e axudarnos a pensar, para espertar a nosa curiosidade e, tamén, para facernos rir tanto.

Pero non só lle damos as grazas por ese tempo compartido tan importante, senón      –sobre todas as cousas– por falar de nós en Galicia, por darnos a coñecer entre a xente de aló e por crer no noso labor cotián. Grazas aos seus comentarios agora coñécennos cada día máis e grazas ás súas palabras outros importantes homes e mulleres da cultura galega como, por citar só uns poucos exemplos, Xosé Luís Méndez Ferrín, Manuel Rivas, Suso de Toro, María do Cebreiro, Eva Veiga ou, recentemente, Víctor Freixanes quixeron vir vernos con moito gusto, ao igual que o fixo vostede, para comprobar por si mesmos os traballos que desenvolvemos.

Dende xa, dámoslle as grazas tamén por sacar un pouco de tempo dentro das súas múltiples obrigas con todo o complicado que iso é e, dese xeito, permitirnos ter, outra vez máis (e agardemos que non sexa a última) o pracer de falar con vostede.

Por último, queremos dar as grazas tamén á Xunta de Galicia que, coma neste caso o fixo a través da Sra. Helena Torres, quen nos acompaña aquí na sala, estivo axudándonos permanentemente para que estes encontros se puideran levar a cabo.

Xabier, Xosé, Helena… Moitísimas grazas, pois, por todo.

 

.::.