O alcalde de Santiago de Compostela, don Xosé Antonio Sánchez Bugallo, visitou o noso instituto e mantivo un encontro co alumnado do nivel Secundario da institución educativa. Nel, o rexedor compostelán mostroulles aos rapaces e rapazas unha visión xeral da cidade de Santiago na que non faltaron detalles culturais, históricos e sociais. Tamén tivo tempo para falar dos retos que se lle presentan á súa cidade no vindeiro ano 2010, que vai ser Ano Xacobeo.

Xa na quenda de preguntas houbo tempo para falar de todo un pouco. Dende a situación económica mundial ata a situación lingüística en Galicia, os temas foron xurdindo de xeito espontáneo a partir das preguntas formuladas polos mozos e mozas, as cales o señor alcalde respondeu con suma amabilidade.

Máis aló do anterior, o mandatario galego mantivo un encontro cos responsables pedagóxicos da institución e co secretario xeral da Fundación Galicia América, José María Vila Alén.