O profesor Afonso Vázquez Monxardín visitounos para impartirlle unha charla ao alumnado do nivel Secundario do centro educativo. Nesta, o investigador achegoulles aos rapaces e rapazas unha visión pormenorizada da relación que mantiveron ao longo da historia as linguas en xeral e a galega en particular coas novas tecnoloxías da información e o desenvolvemento.

A través dunha presentación de power point guiada por ordenador puidemos achegarnos á historia da lingua galega dende as súas orixes ata a súa presenza nos medios de comunicación neste século XXI. O profesor teceu ademais unha ollada de futuro e expuxo as dificultades e os horizontes que ten por diante.

Afonso quixo tamén que puidésemos comprobar in situ a capacidade que  teñen as novas tecnoloxías para o desenvolvemento cultural e lingüístico; deste xeito, puidemos escoitar, entre outras, as voces de Afonso Daniel Rodríguez Castelao ou de Manuel Rivas, arquivos de voz recuperados polo Arquivo sonoro de Galicia do Consello da Cultura Galega do cal el é secretario.

Afonso Vázquez Monxardín

Naceu en Ourense no ano 1960. Móvese entre o mundo da Historia, a Lingua, a investigación e a opinión. Cursou as especialidades de Prehistoria e Arqueoloxía, Arquivística e Biblioteconomía e Xeografía e Historia e Arte de Galicia. Tivo experiencias arqueolóxicas de campo en Galicia, Portugal e Italia. No mundo da lingua é catedrático de Ensino Medio de Lingua e Literatura Galegas e un afervoado defensor das posibilidades plurilingües de Galicia. No da investigación, escribiu artigos sobre historia literaria e elaborou materiais expositivos e didácticos sobre moitos dos autores das nosas letras (Sarmiento, Otero Pedrayo, Avilés de Taramancos, Xoaquín Lorenzo, Manuel Lugrís, Lorenzo Varela…) en relación coas letras galegas e os centros de ensino. Alén do anterior, entre outras moitas actividades, é secretario da Comisión do Arquivo sonoro de Galicia pertencente ao Consello da Cultura Galega.

.::.