Con motivo dunha visita a Bos Aires, Xosé María Dobarro tivo a deferencia de achegarse ao noso instituto e manter un encontro co alumnado do nivel secundario. Nel, o catedrático da Universidade da Coruña falou da situación da lingua galega na actualidade e do futuro que ten por diante.

Os rapaces e rapazas tiveron tamén a oportunidade de formularlle preguntas e, con elas, aprender da man dun dos investigadores máis importantes e recoñecidos da Filoloxía Galega e Portuguesa da actualidade.

Ademais, percorreu as instalacións do instituto educativo e mantivo un encontro co secretario xeral da Fundación Galicia América e cos responsables das áreas pedagóxicas da institución, no que puido interiorizarse dos proxectos educativos que desenvolvemos a cotío. Alén de todo iso tivemos a honra de que asinara o libro de ouro da institución.

Xosé María Dobarro Paz

Xosé María Dobarro Paz naceu en Ferrol, A Coruña, no ano 1950. É catedrático de Filoloxía Galega e Portuguesa da Universidade da Coruña e doutor en Filosofía e Letras pola Universidade de Santiago de Compostela.

Iniciou a docencia universitaria no Colexio Universitario da Coruña no curso 1975-76, do que sería subdirector entre 1985 e 1990, ano de creación da Universidade coruñesa. Nesta última foi director do Departamento de Filoloxías Francesa e Galego-Portuguesa (1990-1993) e decano da Facultade de Filoloxía (1996-1999).

Director de 14 teses de doutoramento e outras tantas de licenciatura, é investigador principal de proxectos relacionados coa literatura galega dos séculos XIX e XX, sobre a que versa a práctica totalidade das súas publicacións.

.::.