O pasado martes recibimos no instituto a visita de dous dos escritores máis salientables do panorama literario galego actual.

Francisco Xosé Fernández Naval e Ramón Caride Ogando compartiron co alumnado do nivel secundario as súas experiencias nun clima de expectación, ledicia e aprendizaxe.

Despois das intervencións iniciais dos escritores, desenvolveuse un produtivo coloquio entre eles e os alumnos e alumnas que serviu para enriquecer a formación integral dos presentes.

Estiveron tamén acompañándonos no acto, que presentou a alumna de 4º curso Betania Márquez Gripo, a delegada da Consellaría de Cultura pola provincia da Coruña, Milagros Lantes Seara e o funcionario e escritor Carlos Arias.

Queremos agradecer fondamente a preocupación que mostra a Xunta de Galicia e, concretamente, a Consellaría de Cultura por achegar aos nosos rapaces e rapazas os pensamentos, realidades e horizontes da Galicia actual a través das súas máis significativas voces.

 

Francisco Xosé Fernández Naval
 

Naceu en Ourense no ano 1956. É autor dunha ampla obra literaria. Di que foi a través dos contos da súa nai (“Ela non nos contaba o conto da caperuchiña vermella, nin pulgarcito, as historias que escoitabamos eran a memoria da familia, do río, da aldea.”) e na súa afección polo cine onde naceu o seu gusto por escoitar xunto coa necesidade de contar. “Aínda que empecei escribindo poemas e pezas teatrais, foi na narrativa onde atopei o mellor lugar para expresar aquilo que quería comunicar. Sen embargo nunca deixei de escribir versos. Ler e escribir poesía é unha necesidade, a certeza de que só ela nos aproxima á intuición do misterio no que nos movemos, do misterio co que cada un convive.”

 

ALGUNAS OBRAS:

• A fonte abagañada, 1980 (poemario). Premio Cidade de Ourense 1980

• Pabellón habitado, 1987 (poemario)

• O bosque das antas, 1988 (novela). Premio Xerais de 1988

• Tempo de crepúsculo, 1993 (novela)

• Sombras no labirinto, 1997 (narrativa)

• Historias roubadas, 1998 (narrativa xuvenil)

• Días de cera, 1999 (poemario)

• O mundo da pesca na literatura galega, 1999 (ensaio)

• Lendas de onte, soños de mañá, 2001 (narrativa xuvenil)

• No corazón da fraga, 2001 (narrativa xuvenil)

• Sete noites e un amancer, 2003 (narrativa)

• Suso Espada. O misterio do Grial, 2003 (narrativa xuvenil)

• Unha cita co aire, 2005 (novela)

• Mar de Lira, 2005 (poemario)

• Respirar polo idioma: (os galegos e Julio Cortázar), 2006 (ensaio)

• Miño, 2008 (poemario)

 

Ramón Caride Ogando
 

Naceu no concello de Cea, Ourense, o ano 1957. É autor dunha extensa obra narrativa, recoñecida pola crítica e os lectores, con novelas como a triloxía de sombras e de lume, integrada por Soños eléctricos (Premio Blanco Amor, 1992), unha das primeiras obras de fantasía científica escritas en galego; Sarou, centrada no submundo do narcotráfico (Premio Café Dublín, 1997); e a recente O Sangue dos camiños (Premio Risco de Literatura Fantástica, 2003). Animador de múltiples actividades culturais, ten desenvolvido ademais unha intensa actividade xornalística dende os anos oitenta.

 

ALGUNAS OBRAS:

• Paisaxe de verde chuvia, 1986 (poemario).

• Todo quanto há no mundo, 1989 (poemario).

• Os ollos da noite, 1990 (relatos).

• Crónicas de sucesos, 1991 (relatos).

• Soños eléctricos, 1992 (novela de ficción científica).

• Cerne das labaradas, 1994 (poemario).

• Lumefrío, 1994 (relatos).

• Fendas no tempo, 1995 (relatos).

• Perigo vexetal, 1995 (narrativa xuvenil).

• Sarou, 1997 (novela).

• Ameaza na Antártida, 1997 (narrativa xuvenil).

• Xeografías do sal, 1998 (poemario).

• O futuro roubado, 1999 (narrativa xuvenil).

• A incerteza dos paraísos, 2000 (relatos).

• Negros espellos, 2001 (relatos).

• As aventuras de Said e Sheila, 2001 (narrativa xuvenil).

• Escáner, 2002 (relatos).

• Diacrónica, 2002 (poemario).

• O sangue dos camiños, 2003.

• Boca da noite, 2003 (relatos).

• O frío azul, 2008 (narrativa) (Premio Lueiro Rey, 2007)