O pasado martes, 1 de xullo, tivemos a
sorte de recibir na nosa institución educativa a compañía dramática
galega “Teatro del Andamio”, a cal estivo actuando para o alumnado maior
do instituto. Representaron a obra “A lingua das bolboretas” baseada nun
dos contos que compoñen o libro “Que me queres amor?” de Manuel Rivas.
Álvaro Guevara no papel protagonista fixo
que os rapaces e rapazas tiveran un encontro fiel cun pasado non tan
afastado e difícil de entender da nosa terra.
A infancia de Monchiño, un neno de seis
anos, é lembrada polo actor cunha tenrura chea de reflexión e dramatismo
que nos achega a eses tristes momentos da primavera de 1936 previos ao
estoupido da Guerra Civil española.
Durante a actuación, recordamos o primeiro
día de escola do rapaz, a ledicia que sentía cando aprendía cousas
novas, o respecto e admiración que o alumno tiña polo mestre don
Gregorio e a tristura escaldada por un momento no cal a supervivencia
tinguiu de desesperanza o futuro dunhas xentes que, presas polo medo
mentres no seu interior o voitre esnaquiza o seu futuro sen remisión,
deben asistir a un desesperante final.
A compañía permitiu achegar ao alumnado
unha arte, que, como dixeron os profesores Fernando Naval e Ángeles
Iglesias Conde na presentación dos artistas, serve para formar, máis aló
de divertir. Ademais de Álvaro Guevara, estiveron connosco Manu Clavijo
(música en vivo) e Anxo Tirado (iluminación) aos cales lles agradecemos
fondamente a súa deferencia connosco e todas as ensinanzas que nos
deixaron.
