O pasado mércores, día 10 de setembro, recibimos na nosa institución a visita do máximo mandatario da Deputación de Lugo, don Xosé Ramón Gómez Besteiro.

O señor presidente, máis aló de percorrer as instalacións educativas e saudar aos directivos da Fundación Galicia – América, mantivo un longo encontro co alumnado do instituto, no cal –entre outras cousas– lles explicou a maneira de participar nos proxectos que a Deputacion de Lugo desenvolve.

Os rapaces e rapazas do nivel secundario, reunidos no salón de actos do centro escolar, someteron ao presidente a unha intensa quenda de preguntas de temática variada, pero centrándose fundamentalmente na provincia luguesa. Entre xogos e didáctica, don Xosé Ramón achegoulles “a aposta polo medio ambiente e as novas tecnoloxías que está a levar adiante a Deputación”.

Para rematar, e co obxectivo de afondar no uso tecnolóxico, o presidente fíxolles entrega aos rapaces e rapazas dunha memoria dixital de carácter educativo.

Moitas grazas, don Xosé Ramón, pola súa visita.