Coa presenza do señor director xeral de Creación e Difusión Cultural da Consellaría de Cultura e Deporte da Xunta de Galicia, don Luís Bará Torres, e das autoridades do Consello de Administración da Fundación Galicia – América na Arxentina, recibimos na nosa institución ao grupo de música tradicional galega Malvela.

Logo das palabras de benvida pronunciadas pola alumna de 2º curso de Bacharelato Daniela Benemio López, deu comezo o concerto coa interpretación, a xeito de agasallo para as visitas, de dúas pezas a cargo do grupo de bailes e cantos tradicionais da institución.

Malvela principiou, a continuación, o seu concerto e, nun clima de festa absoluto, desenvolveron un percorrido por algunhas das cancións máis emblemáticas do noso folclore tradicional. Non faltaron os bailes improvisados do alumnado e tamén a interacción permanente do auditorio coas e cos artistas.

Salientamos tamén a presenza da prestixiosa e internacionalmente recoñecida voz de Uxía Senlle quen tivo a deferencia de interpretar dúas pezas que produciron no auditorio un silencio de expectación e admiración máximo.

Grazas, por vir compartir connosco este momento que serviu para achegar ao alumnado outra parte, non menos importante, do patrimonio cultural galego.

MALVELA

www.malvela.info

 

O grupo Malvela xurdiu a partir dun cursiño de cantos populares dirixido pola cantante Uxía e organizado hai xa uns anos pola Asociación de Mulleres Rurais de Mos.

O que nun principio foi unha actividade cultural, logo deu en converterse nunha paixón continuada, ata que a madurez e as ganas de rescatar e transmitir as cancións que gardaban na súa memoria, levaron a Malvela a concibir unha actividade artística fora do tradicional ámbito doméstico.

Convén sinalar que tanto nos discos como nos directos, Malvela, transmite un ambiente festivo ao que contribúe tamén o feito de xunguir distintas xeracións de mulleres, dende a veteranía dos oitenta anos da Sra. Carmen ata os vinte e seis da gaiteira Raquel, a máis nova, e xunto con elas as demais voces: Matilde, Silvina, Fita, Clara, Camiña, Carmen, Lina, Maruxa, Dina, Aurita, Teresa, Merche e Adela.

Todas elas rescatan eses cantares vellos coa súa forza e convicción naturais que empregan ben a fondo cada vez que pisan un escenario.

Así, un concerto de Malvela é sempre participativo, unha ocasión única para gozar da mellor música popular.

Elas fan posible que a tradición musical galega reviva con frescura e espontaneidade e que chegue a todo tipo de xente.

 

O grupo esta acompañado dunha variada instrumentación:

Gustavo Domínguez(acordeón)

Raquel Domínguez (gaita e frautas)

Pablo Ces (bombo)

Anxo Pardo (tambor e tarrañolas)

Abilio Santos (cavaquiño e harmónica)

Ana Senlle (dirección vocal)

www.malvela.info

 

UXÍA SENLLE

 

Uxía comezou a cantar dende moi nova e edita o seu primeiro álbum, Foliada de marzo en 1986, con só vinte e catro anos. Naquel entón realiza unha música bastante próxima ao tradicional, influenciada polo espertar da poesía galega na música popular. Ao ano seguinte incorpórase como vocalista ao grupo “Na lúa”, un dos buques insignias do folk galego, e talvez o máis renovador dos anos oitenta. Catro anos despois, en 1991, deixa o grupo e edita outro álbum en solitario, o cosmopolita Entre cidades.

O 6 de marzo de 1994 participa no espectáculo Mulleres a viva voz, con Amália Rodrigues e coa mallorquina María del Mar Bonet. A partir dese momento continuará na liña máis cosmopolita, destacándose polas súas intervencións en discos alleos, polas colaboracións en concertos de varios artistas e pola creación de espectáculos plurais sobre a canción de mulleres ou o ámbito lusofonía.

Con todo, o seu maior éxito foi o álbum Estou vivindo no ceo, producido polo portugués Júlio Pereira, e que a deu a coñecer en toda Europa. Nel renova a canción tradicional galega e dálle pé á aparición de todo un amplo abano de vocalistas femininas nos finais dos anos noventa, como Guadi Galego, Leilía ou Anubía. Foi recoñecido pola crítica europea coma un dos mellores de 1995.

 

Discografía

• Foliada de marzo (Edigal), 1986

• Entre cidades (Sons Galiza), 1991

• Estou vivindo no ceo (Nubenegra), 1995

• La Sal de la Vida (Nubenegra), 1997, en colaboración con Rasha, María Salgado e Xesús Pimentel)

• Danza das Areas, (Virgin), 2000

• Eterno navegar, (Harmonía Mundi. World Village), 2008.