Estíbaliz Espinosa
Estíbaliz Espinosa é unha escritora,
cantante e actriz que naceu na Coruña o 6 de xullo de 1974. Tense
definido a si mesma como híbrida, mutante ou anónima. Experimental e
reflexiva co eido artístico, mestura ciencia-ficción, dramaturxia e
ironía en moitas das súas propostas.
Como poeta deuse a coñecer con Mecánica
Zeleste [1999]. Posteriormente obtivo o Premio Esquío con Pan (libro de
ler e desler) (2000). Caracterízase por crear unha poesía cósmica, con
elementos primixenios, toques de ironía, reflexión e certa
despoetización da materia convencionalmente poética. Segue nese fío en –orama
[Col. Tambo, 2002], facendo un xogo de palabras co seu libro anterior.
Neste conxunto de textos hai referencias ao cine, á ollada e ollo
humanos, ao espazo exterior, e xoga con influencias dende científicas
ata provintes do eido das artes plásticas, dos contos de fadas, do
debuxo, da música, da matemática ou da astronomía. Unha sección de -orama
recibe o Premio Díaz Xácome de Novos Creadores en 2001. número e (Premio
Espiral Maior 2001) pecha ese primeiro ciclo, con textos que aluden aos
números, á identidade perdida e á cibernética.
Na rede é responsábel de varios proxectos:
os blogs ...mmmm..., [...] e abra a cápsula, por favor. Experimenta con
ambientacións sonoras, canto e ruidismo. Ten gravado audiopoemas
[Instituto Cervantes de Nova Iorque, El Gaviero, 2005] e podcasts [1º
premio de Podcasts Poético-Artísticos do Ajuntament de Tarragona, 2006].
Como actriz traballou en varias compañías
galegas. Presentou o proxecto persoal Opia no Fórum Metropolitano,
mestura de textos e canto. Protagoniza a curtametraxe Reverso [M.
Trincado, 1998] e colabora nunha videoinstalación [Pablo Zas, 2007].
Como cantante, desenvolve nos ámbitos do
jazz e o canto lírico.
Codirixiu e presentou Ulalume, un programa
de contacontos na radio independente Cuac FM [1996-2001]. De aí xurdíu
Contacontos Ulalume.
Ten obra traducida ao alemán, ruso,
castelán, inglés e italiano.
Publica textos en Babelia (El País) e no
suplemento cultural do ABC.
Participou en numerosas revistas de ámbito
nacional e internacional: Salamandria, müsu, Compostelán, Madrygal,
Çopyright, O ollo público, Alhucema, Cooltural Galicia, Serta, La Caleta,
A Xanela, Casa da Gramática, Idearia
