O alumnado de cuarto curso de Bacharelato visitou o pasado martes, 19 de agosto, a Delegación da Xunta de Galicia en Bos Aires para ollar a mostra “Nós mesmos. Asociacionismo galego na emigración”.

Esta exposición itinerante está organizada polo Consello da Cultura Galega, a través do seu Arquivo da Emigración, en colaboración coa Secretaría Xeral de Emigración da Xunta de Galicia.

En diferentes paneis, recolle datos e imaxes de centros, irmandades, escolas da emigración e agrupacións de todo tipo que manteñen aínda hoxe o facho da nosa cultura no mundo. Cuestións coma os países que contan con agrupacións deste tipo, os concellos cunha maior representación no exterior ou o número e localizacións de escolas promovidas desde o exterior son algunhas da cuestións que trata o proxecto.

Os rapaces e rapazas do instituto, divididos en grupos, recompilaron información para a realización posterior dun traballo práctico acerca das actividades da emigración, das sociedades por países e dos centros galegos espallados polo mundo, da educación promovida polos emigrantes, das actividades artísticas e pictóricas desenvolvidas, dos movementos políticos, do papel transcendente da muller, da atención aos maiores e dos movementos impulsados pola mocidade.

No seguinte enlace poden descargar o libro da exposición:

 

http://consellodacultura.org/mediateca/?p=333

 

Queremos manifestar o noso agradecemento ao persoal da Delegación da Xunta de Galicia en Bos Aires por todas as atencións mostradas e, de maneira especial, á señora delegada, María Xosé Porteiro, por facer posible esta visita que nos permitiu achegarnos de xeito didáctico a parte da nosa historia.

.