O Instituto Arxentino Galego Santiago Apóstolo participou do 6º Encontro de Bibliotecas de Colectividades que se desenvolveu no Complexo Cultural e Ambiental “Xardín Xaponés”, organizado por     a Biblioteca de Cultura Xaponesa e Ambiental de Cidade Autónoma de Buenos Aires; a Biblioteca “Matxin Burdin” do Centro Basko “Euzko Etxea” da Prata e a Biblioteca Galega de Bos Aires da Federación de Asociacións Galegas da República Arxentina.

O alumnado do nivel secundario e dos cursos máis avanzados do nivel primario da nosa institución tivo a honra de poder manter un encontro con don Xosé Neira Vilas a través dunha videoconferencia que conectou Galicia co Salón Xacobeo do noso instituto o pasado martes, 26 de maio.

Os mozos e mozas escoitaron atentamente a intervención de don Xosé e, logo da conferencia do ilustre escritor, realizáronlle unha xeira de preguntas que amablemente foron por el respondidas e permitiron coñecer de primeira man momentos transcendentes da súa vida e obra.

O pasado venres, 20 de maio, o Instituto Santiago Apóstol festexou o Día das Letras Galegas.

Este ano, os rapaces e rapazas rendéronlle homenaxe ao poeta Lois Pereiro mediante tres presentacións cheas de sentimento, acción e respecto pola figura homenaxeada.

Mediante unha atractiva e sorprendente posta en escena, o numerosísimo público que ateigou o Salón Valle Inclán do Centro Galicia de Bos Aires puido achegarse con rigor á vida e obra dun dos representantes da contracultura dos anos 80.

Grazas á Dirección Xeral do Libro, Bibliotecas e Arquivos dependente da Consellería de Cultura e Turismo da Xunta de Galicia, un cento de mozos e mozas do noso instituto asistiron o xoves, 28 de maio, á presentación “Cunqueiradas” que o actor galego Cándido Pazó realizou no marco da 37ª Feira do Libro de Bos Aires.

Tal e como fixera dous días antes no Salón Valle Inclán do Centro Galicia (naquel encontro representou a obra “Memorias dun neno labrego” baseada no libro homónimo de Xosé Neira Vilas), os mozos e mozas non pararon de gozar ante o enxeño e a improvisación dun dos máximos representantes actuais da escena galega.

O Prof. Francisco Collantes brindou unha amena charla aos alumnos dos graos superiores en que abordou o tema da vestimenta tradicional de Galicia. Mostráronse bonecos con roupa típica e un vídeo en que se puideron apreciar diferentes traxes segundo a rexión e a ocasión de uso.

O pasado día 20 de maio festexamos o Día das Letras Galegas na nosa institución. Por esa razón, no salón Valle Inclán do Centro Galicia de Bos Aires, desenvolvemos pola mañá dous actos destinados ao alumnado, familias e colectivo docente e, xa pola tarde, outro para o conxunto da colectividade galega e público en xeral.

En todos os encontros o gran salón quedou pequeno para acoller o público  asistente, impaciente por acompañar e compartir a homenaxe que o Instituto Santiago Apóstol lle rendeu ao gran poeta do Courel, Uxío Novoneyra.

Dende esta páxina, desexamos agradecer a todos aqueles que seguen apoiando firmemente unha Galicia sen fronteiras físicas e confían no noso centro educativo como un fincón inmorredoiro de esperanza para a nosa lingua e cultura. Xa o dixo Novoneyra: A poesía entre nós inda segue sendo moito conciencia e voz.

R

ecibimos a visita do Sr. director xeral de Promoción e Difusión da Cultura da Xunta de Galicia, don Francisco López Barxas, quen –alén de Ramón Abal e Carlos Airas, funcionarios do goberno galego– veu acompañado de Benigno Campos, recoñecido cociñeiro e presentador do programa Larpeiros da Televisión de Galicia.

Durante a súa estadía no noso centro educativo, o director xeral tivo oportunidade de percorrer as instalacións, interiorizarse dalgúns dos proxectos que desenvolvemos e coñecer o sistema de traballo que empregamos. Asemade, asistiu á charla que mantivo Benigno Campos co alumnado do nivel Secundario no salón Xacobeo do instituto, durante a cal os rapaces e rapazas puideron dialogar co prestixioso cociñeiro. Antes desta intervención, don Francisco López Barxas dirixiulles unhas palabras aos mozos e mozas inzadas de propostas de futuro.

A través destas humildes verbas, o Instituto Santiago Apóstol desexa manifestar a súa ledicia polo merecido nomeamento, alén de transmitirlle ao ilustre académico o máis fondo agradecemento por ternos achegado, durante a súa visita ao noso centro de estudos, aqueles momentos de inesquecible aprendizaxe tinxida de cordialidade e concordia, que só as grandes personalidades emanan sen artificios forzados.

Parabéns, Manuel.

Tivemos o honor de recibir a dona Margarita Ledo, académica numeraria da Real Academia Galega.

Ao longo do seu percorrido polas nosas instalacións puido coñecer todos os nosos proxectos xerais presentes e futuros, ademais de interiorizarse do labor que, nas materias vinculadas con Galicia, desenvolvemos.

Dona Margarita, acompañada polo seu marido, don Cipriano Luís Jiménez Casas, puido coñecer de man dos directores do instituto os traballos realizados nos tres niveis educativos e o sistema de coordinación e articulación entre materias da institución.

Durante o seu percorrido visitou varias clases do centro escolar e, asemade, asistiu a unha clase de Lingua Castelá impartida pola profesora Andrea Ríos na que escoitou a exposición da alumna de 2º curso de Bacharelato Fátima Rosón, a partir dunha lectura seleccionada previamente.

O pasado mércores recibimos a visita do prestixioso xornalista galego Arturo Lezcano acompañado pola súa esposa Elvira.

Ás 9:30 horas foron recibidos polas autoridades educativas do centro de estudos que os acompañaron á sala de reunións da Fundación Galicia América para que, compartindo un café, puidesen coñecer algúns dos proxectos que desenvolvemos ao longo do ano.

A continuación, ás 10 da mañá, o xornalista ourensán dirixiuse cara ao salón de actos para manter un encontro co alumnado do nivel Secundario que o agardaba con impaciencia. Na súa alocución, antes de que os rapaces e rapazas iniciasen a quenda de preguntas, Arturo Lezcano achegoulles aos mozos e mozas unha visión persoal, directa e –nalgún caso– novidosa do escritor Eduardo Blanco Amor alén de diagramar algunhas pinceladas sobre outras figuras das nosas letras, ás cales tamén tratou.

O pasado sábado, día 10 de outubro, dúas rapazas e dous rapaces de 4º e 5º cursos do nivel Secundario foron os encargados de representar a Galicia no VII Festival Internacional de Teatro de Bos Aires.

Coa lectura dun fragmento adaptado da obra teatral “A noite vai coma un río” do escritor mindoniense Álvaro Cunqueiro, que dirixiu o profesor de teatro do noso centro de estudos, Fernando Naval, achegaron a lingua e a literatura de Galicia a toda a colectividade e a aqueloutras persoas interesadas en afondar nun mundo marabilloso de ilusións e realidades.

Cómpre salientar tamén que ao público asistente se lle entregou unha tradución ao castelán do fragmento. Este traballo de translación lingüística realizouna o alumnado de 5º curso de Bacharelato.

Dende esta páxina, queremos agradecer o apoio do Sr. delegado en Bos Aires da Xunta de Galicia e, do mesmo xeito, os ánimos e o entusiasmo de todas as persoas que estiveron presentes na representación acompañando a magnífica interpretación dos actores e actrices.

A escritora Ánxela Gracián visitou o noso centro educativo e mantivo dous encontros co alumnado da institución.

A escritora luguesa pronunciou unha charla ao alumnado de 4º e 5º cursos do nivel Secundario. O alumnado, que se mostrou sumamente interesado durante a charla, formulou preguntas variadas nas que as curiosidades vinculadas coa tradución de textos tiveron o seu espazo protagonista.

Ademais da súa asistencia ao acto institucional do Día das Letras Galegas, o vicerreitor da Universidade de Vigo, don Iván Area Carracedo, mantivo un encontro co alumnado de 4º e 5º cursos do nivel Secundario. Nel,  o profesor de Matemática Aplicada explicoulles o funcionamento xeral da súa universidade e resolveu as múltiples cuestións que se lle formularon, e que tiveron como eixe central os estudos superiores.

O venres, día 15 de maio, desenvolvemos no Salón Valle Inclán do Centro Galicia de Bos Aires o acto institucional conmemorativo do Día das Letras Galegas. Coma todos os anos, neste 2009, o alumnado rendeu homenaxe á figura designada pola Real Academia Galega como persoeiro destacado.

O alcalde de Santiago de Compostela, don Xosé Antonio Sánchez Bugallo, visitou o noso instituto e mantivo un encontro co alumnado do nivel Secundario da institución educativa. Nel, o rexedor compostelán mostroulles aos rapaces e rapazas unha visión xeral da cidade de Santiago na que non faltaron detalles culturais, históricos e sociais. Tamén tivo tempo para falar dos retos que se lle presentan á súa cidade no vindeiro ano 2010, que vai ser Ano Xacobeo.

Nada máis chegar, logo dos saúdos pertinentes, dirixíronse á biblioteca dos niveis Infantil e Primario. Alí, xunto con algúns dos rapaces e rapazas de cuarto, sexto e sétimo cursos idearon un fermoso conto cheo de maxia e sentimento. Á vez, Xosé Cobas ía recreando con fermosas ilustracións as palabras que escritor e alumnado tan ben lograron conxugar.

A delegación arxentina da Fundación Galicia América agradeceulles a súa presenza e, en especial a Xabier, mostroulle institucionalmente o aprecio que por el temos. Cómpre salientar que foi Xabier Puente Docampo, hai catro anos, a primeira visita ilustre que tivemos e que mostrou grande interese polo traballo que desenvolvemos. Por ternos sempre presente e por ser o primeiro en darnos a coñecer dentro das fronteiras administrativas de Galicia, moitas grazas.

Acompañado por Afonso García Sanmartín, presidente da Asociación Galega de Editores, e por Luz Picos Fernández, secretaria técnica da devandita organización, o ilustre escritor pontevedrés chegou ao noso instituto. No corredor da entrada principal foi recibido polas autoridades da Fundación Galicia América, as autoridades pedagóxicas e o presidente do Centro Galicia de Bos Aires, don Héctor Fernández Álvarez.

Ademais do frutífero encontro que Xosé Antonio Neira Cruz mantivo co alumnado maior do centro de estudos, pola tarde achegouse de novo ao instituto para realizar unha exposición diante do noso colectivo docente.

A charla, coordinada pola profesora Alicia Salvi abordou a importancia do fomento da lectura.

Visitounos Xosé Antonio Neira Cruz para manter un encontro co alumnado de cuarto e quinto curso do nivel Secundario do instituto.

Na súa disertación, o escritor santiagués achegoulles aos rapaces e rapazas a súa intransferible visión da literatura infantil e xuvenil, contoulles cales eran os seus alicerces creadores e inculcoulles a importancia da tradición oral para a creación literaria.

O profesor Afonso Vázquez Monxardín visitounos para impartirlle unha charla ao alumnado do nivel Secundario do centro educativo. Nesta, o investigador achegoulles aos rapaces e rapazas unha visión pormenorizada da relación que mantiveron ao longo da historia as linguas en xeral e a galega en particular coas novas tecnoloxías da información e o desenvolvemento.

O poeta José Martínez-Bargiela visitou o noso instituto para doar á biblioteca do centro educativo un exemplar da súa última obra. “El navegante / O navegante: Pedro Sarmiento de Gamboa".

No xemólogo e deseñador de xoias José Carlos Pereira Calviño mantivo un encontro co alumnado de 4º e 5º cursos do Bacharelato. Nesa charla, achegoulles aos rapaces e rapazas as actividades que se desenvolven na Escola de Xoiería do Atlántico, onde el é profesor.

Recibimos no instituto a visita do presidente do Partido Popular de Galicia e próximo Presidente da Xunta de Galicia, don Alberto Núñez Feijoo.

Nada máis chegar, logo de saudar as autoridades institucionais e pedagóxicas, sen présas, con moita dispoñibilidade e mostrando grande interese, realizou un percorrido por todo o centro educativo dende o nivel infantil ata o nivel secundario. Nese periplo, tivo ocasión de coñecer as instalacións, saudar a parte do colectivo docente e, por riba de todo, falar cos alumnos e alumnas que o agardaban con moita impaciencia.

Recibimos a visita do senador Xosé Manuel Pérez Bouza. Durante o seu percorrido polas instalacións do centro educativo tivo ocasión de interiorizarse das actividades pedagóxicas e culturais que desenvolvemos a cotío alén de manter un encontro co secretario xeral da Fundación Galicia América.

José Ignacio López, secretario da Academia Nacional de Xornalismo de Arxentina visitou o noso instituto e tivo oportunidade de coñecer as actividades que levamos a cabo. No encontro que mantivo con José María Vila Alén, secretario xeral da Fundación Galicia América, tomou contacto con todas as propostas pedagóxicas que o noso centro educativo ofrece e interiorizouse das ofertas de futuro previstas.

O xornalista Luís Celeiro estivo visitando as instalacións do Santiago Apóstol. Durante o seu percorrido puido coñecer polo miúdo o funcionamento da institución educativa e interiorizarse dos proxectos presentes e futuros do noso instituto.

Alén diso, impartiu unha conferencia titulada “O Camiño de Santiago como espazo de comunicación”. Nela, destacou o papel dos medios de comunicación en Galicia e a súa contribución ao desenvolvemento cultural do país, e referiuse tamén á Universidade de Santiago como un motor para o emprendemento e como “a grande creadora e transmisora de coñecemento”.

Con motivo dunha visita a Bos Aires, Xosé María Dobarro tivo a deferencia de achegarse ao noso instituto e manter un encontro co alumnado do nivel secundario. Nel, o catedrático da Universidade da Coruña falou da situación da lingua galega na actualidade e do futuro que ten por diante.

O Instituto Santiago Apóstol celebrou o acto protocolario da fin de obra do quinto andar do edificio.

Presidiu este acto a Sra. Conselleira de Educación da Xunta de Galicia, dona Laura Elena Sánchez Piñón e acompañáronnos nesta ocasión o Sr. Ministro de Educación do Goberno da Cidade Autónoma de Buenos Aires, don Mariano Narodowski; o Sr. Ministro Conselleiro da Embaixada de España, don Rodrigo Aguirre de Carcer; o señor Benito Zaidenknop, director pedagóxico da Dirección Xeral de Educación de Xestión Privada; o enxeñeiro Martín Ramos, supervisor de nivel Medio; a profesora Dolores Gil, supervisora de nivel Inicial e Primario; presidentes e representantes de entidades da colectividade galega e corpo diplomático do Estado Español.

O Instituto Santiago Apóstol tivo o honor de recibir ao internacionalmente recoñecido músico Carlos Núñez.

O entusiasmo expectante que o alumnado do centro educativo tiña veuse colmado pola grandeza dun home que, cunha sinxeleza incrible, soubo transmitir ensinanzas que van máis aló do seu virtuosismo como extraordinario compositor e intérprete.

Foi unha hora e media intensísima na que o Santiago Apóstol puido vibrar cun número 1, un grande non só como músico, senón fundamentalmente como persoa.

Grazas ás xestións desenvolvidas pola delegada da Xunta de Galicia en Bos Aires e ao interese mostrado polo escultor e arquitecto arxentino, o alumnado de Bacharelato puido escoitar de primeira man as reflexións deste ser humano universal.

Don Adolfo, dando mostra dunha gran sinxeleza e humildade, achegouse á nosa institución e, máis aló de percorrer as instalacións do centro educativo e interiorizarse do funcionamento pedagóxico, transmitiunos a todos os presentes ensinanzas de futuro e baseamentos humanísticos fundamentais, que endexamais se deberían esquecer.

Neste encontro presentáronlle ao alumnado o espectáculo “De amor e morte” Ouriol constituíuse no 2000, como confluencia das diversas traxectorias creativas dos seus membros: a capacidade expresiva da poeta e comunicadora Eva Veiga, responsable da selección poética de todos os espectáculos do grupo, foi dar coa sensibilidade e a axilidade improvisadora de dous músicos con ampla experiencia no mundo do jazz e da música para teatro.

Nunha mañá chea de maxias, lingua galega e moi bo ambiente o gran escritor galego guiou ao alumnado co fin de crear un conto colectivo onde a imaxinación foi a protagonista. Rematado o encontro, visitou as instalacións do centro educativo e asinou no libro de ouro da institución. Agradecemos fondamente a Santiago a súa deferencia connosco e agardamos volver velo pronto no noso instituto.

Con motivo da súa visita a Bos Aires para repatriar os restos do galeguista Ramón Suárez Picallo, don Abel quixo coñecer a nosa institución e interiorizarse das actividades que desenvolvemos a cotío. Acompañado por dona Ana Miranda, responsable da Comisión de Emigración do Bloque Nacionalista Galego, por José María Vila Alén, secretario xeral da Fundación Galicia América, e polas autoridades educativas do centro escolar percorreu as nosas instalacións e conversou sobre diferentes aspectos educativos de actualidade.

A señora Paula Fernández Pena, alcaldesa do concello de Silleda (Pontevedra), acompañada por don Xosé María Vila Alén (secretario xeral da Fundación Galicia América) e dos responsables educativos, visitou as nosas instalacións, interesouse polos proxectos que o instituto desenvolve e dialogou co alumnado dos diferentes niveis pedagóxicos.

O señor alcalde do concello pontevedrés de Oia, Alejandro Rodríguez Rodríguez, visitounos e observou con moito interese o funcionamento do centro educativo. Durante o percorrido polas nosas instalacións, acompañado polos señores membros da Delegación arxentina da Fundación Galicia América, dialogou co alumnado e coñeceu máis polo miúdo todas as nosas actividades.

Recibimos na nosa institución a visita do máximo mandatario da Deputación de Lugo, don Xosé Ramón Gómez Besteiro. O señor presidente, máis aló de percorrer as instalacións educativas e saudar aos directivos da Fundación Galicia – América, mantivo un longo encontro co alumnado do instituto, no cal –entre outras cousas– lles explicou a maneira de participar nos proxectos que a Deputacion de Lugo desenvolve.

Este luns, 25 de agosto, recibimos con enorme ledicia a visita de dona María Xosé Porteiro, delegada da Xunta de Galicia en Bos Aires.

Queremos agradecerlle fondamente a súa presenza no noso instituto, pois este centro educativo, obra da Xunta de Galicia e do Centro Galicia de Bos Aires, forma parte perenne desa Galicia global na que todos nós nos asentamos e á cal a señora delegada contribúe cos seus esforzos cotiáns.

O alumnado de cuarto curso de Bacharelato visitou o pasado martes, 19 de agosto, a Delegación da Xunta de Galicia en Bos Aires para ollar a mostra “Nós mesmos. Asociacionismo galego na emigración”.

Esta exposición itinerante está organizada polo Consello da Cultura Galega, a través do seu Arquivo da Emigración, en colaboración coa Secretaría Xeral de Emigración da Xunta de Galicia.

O Instituto Santiago Apóstol celebrou institucionalmente o Día de Galicia, festividade de importancia máxima para o centro educativo ao igual que para a terra que é o xermolo desta iniciativa pedagóxica en Bos Aires.

Nesta ocasión, co gallo da declaración por parte da UNESCO deste 2008 como “Ano Internacional das Linguas”, o alumnado dos diferentes niveis da institución preparou un acto que pretende achegar a toda a comunidade escolar e non escolar unha preocupación de interese máximo para todas as culturas do planeta.

Tivemos a sorte de recibir na nosa institución educativa a compañía dramática galega “Teatro del Andamio”, a cal estivo actuando para o alumnado maior do instituto. Representaron a obra “A lingua das bolboretas” baseada nun dos contos que compoñen o libro “Que me queres amor?” de Manuel Rivas.

O coro do instituto abriu o "Encontro Coral" que organizou o pasado venres, 27 de xuño, a Comisión de Cultura do Centro Galicia de Bos Aires. Diante do público que enchía o Salón Valle Inclán da institución galega, os rapaces e rapazas que compoñen o noso coro infantil, interpretaron en primeiro lugar a canción "O meu país" de Xoán Manuel Casado e Miro Casavella e, posteriormente, a cantiga tradicional galega "A muller do tío Mateu".

O pasado xoves, día 29, grazas ao interese mostrado pola señora María Xosé Porteiro, Delegada da Xunta de Galicia en Bos Aires, o noso alumnado do nivel secundario tivo a oportunidade de compartir experiencias co profesor Francisco Soñora Luna, quen visitou Bos Aires para impartir unha conferencia no marco das Xornadas sobre cambio climático que organizou a devandita delegación.

O Sr. Presidente da Xunta de Galicia viaxou a Bos Aires para celebrar os actos oficiais correspondentes ao Día das Letras Galegas 2008. Nesta visita, ademais de altos cargos políticos, acompañaron a don Emilio Pérez Touriño senlleiras personalidades culturais galegas entre as que podemos citar a Xesús Alonso Montero, Isaac Díaz Pardo ou Claudio Rodríguez Fer.

Dentro das actividades que o señor Presidente desenvolveu, o noso instituto estivo presente contribuír nos actos desta emotiva celebración.

Recibimos a visita na nosa institución da Sra. María Sol López Martínez, secretaria xeral de Política Lingüística da Xunta de Galicia. Ademais de compartir un almorzo cos membros da Delegación arxentina da Fundación Galicia América, percorreu as instalacións do centro educativo e visitou as obras do 5º piso, a piques de rematar.

Celebrouse –coma cada ano– o Día dás Letras Galegas. Nesta ocasión, dedicouse a recordar a figura do escritor Xosé María Álvarez Blázquez.
O Instituto Santiago Apóstol, como en anos precedentes, sumouse a estas conmemoraciones coa celebración dun acto no cal se desempañaron os alumnos dos niveis primario e secundario.

O alumnado do nivel secundario tivo a oportunidade de compartir uns momentos coa artista Estíbaliz Espinosa. No salón de actos Xacobeo, durante unha hora e media, a escritora coruñesa achegou aos presentes unha visión da poesía actual e, a través de varias actividades onde participaron os rapaces e rapazas do instituto, presentou e interpretou varios textos literarios.

Coa presenza do señor director xeral de Creación e Difusión Cultural da Consellaría de Cultura e Deporte da Xunta de Galicia, don Luís Bará Torres, e das autoridades do Consello de Administración da Fundación Galicia – América na Arxentina, recibimos na nosa institución ao grupo de música tradicional galega Malvela e á cantante Uxía Senlle.

O pasado mércores Marisa Irima compartiu co noso alumnado de 4º, 5º, 6º e 7º curso do nivel primario unha xornada chea de emocións e ledicias.

A través de distintas actividades prácticas, a prestixiosa ilustradora galega foi interactuando co alumnado e percorrendo as distintas etapas da creación literaria gráfica.

O pasado martes recibimos no instituto a visita de dous dos escritores máis salientables do panorama literario galego actual.

Francisco Xosé Fernández Naval e Ramón Caride Ogando compartiron co alumnado do nivel secundario as súas experiencias nun clima de expectación, ledicia e aprendizaxe.