INVITACIÓN Día de Galicia 2008

Bos Aires, 14 de xullo de 2008

Estimadas familias:

O vindeiro mércores, 23 de xullo, dous días antes do comezo das vacacións de inverno, o Instituto Santiago Apóstol vai celebrar institucionalmente o Día de Galicia, festividade de importancia máxima para o centro educativo ao igual que para a terra que é o xermolo desta iniciativa pedagóxica en Bos Aires.

Nesta ocasión, co gallo da declaración por parte da UNESCO deste 2008 como “Ano Internacional das Linguas”, o alumnado dos diferentes niveis da institución preparou un acto que pretende achegar a toda a comunidade escolar e non escolar unha preocupación de interese máximo para todas as culturas do planeta.

Cada 15 días unha lingua desaparece deste mundo que habitamos; cada dúas semanas unha maneira de dicir “quéroche moito” deixa de escoitarse ao longo dos horizontes da esperanza colectiva e, con iso, empobrece simultaneamente o noso espírito.

Segundo testemuñan os lingüísticas e expertos na materia, a metade das 6900 linguas do planeta están en perigo de desaparición e con elas, como dicía don Ramón Otero Pedrayo, irase para sempre –oxalá que non– unha cultura que ninguén xa fará coñecer máis entre os vivos.

Concienciar á xente do perigo que isto supón para a esencia patrimonial da nosa especie, achegar unha visión moderna e real do que isto representa será o eixe central do acto que desenvolveremos e no cal agardamos poder contar coa súa presenza.

Pecharemos o evento mostrando outra realidade: a loita dun idioma (a lingua galega) e dos seus falantes por manter vivas as súas tradicións, por achegar novos alicerces de esperanza de futuro para a súa esencia como pobo está dando os seus froitos.

Haberá tempo para a música; a presenza do conxunto de baile e canto tradicional da escola, do coro escolar, do grupo de música folk “Proxecto Apóstolo” e a actuación dalgúns rapaces e rapazas do nivel secundario con dúas propostas diferentes farán de roncóns reivindicativos ante a realidade antes dita.

Aproveitaremos ademais para facer entrega dos trofeos dos “Xogos do Santiago 2008” nos que participa todo o alumnado do centro educativo dividido en catro equipos que representan ás catro provincias galegas.

Por todo o anterior, a través desta nota, invitámolos a que nos acompañen en tan sinalada data e, se o consideran oportuno, o difundan nos seus medios.

O acto, aberto a todo o público, desenvolverase no pavillón de deportes do Centro Galicia de Bos Aires (Bartolomé Mitre, 2552 – 4º andar) e principiará ás 09:00 horas.

 Asdo: Delegación arxentina da Fundación Galicia - América

ir arriba